നീയകലേക്ക് പോയ്മറഞ്ഞാൽ
ഞാനേകനായെങ്ങനെ നാൾ കഴിക്കും
മിണ്ടാതെയറിയാതെയെത്രനാൾ നീ
ദൂരങ്ങളിൽ മൗനവ്രതമിരിക്കും
നീയറിയുന്നില്ലയെന്നുടെ നെഞ്ചിലെ
എരിയുന്ന തീക്കനലിന്റെ ചൂട്
മാരിക്കാർ കാക്കുന്ന വേഴാമ്പലാലായി ഞാൻ
എത്രയോ നാളുകൾ കാത്തിരിക്കാം
നിന്നകതാരിലെനിക്കായൊരിത്തിരി
ഇടമുണ്ടാകുമോ പ്രണയത്തിനായ്
നിന്നുടെയേകാന്ത വേളകളിൽ
എന്നെയും കൂട്ടിനായ് കൂട്ടീടുമോ
ഇനിയൊന്നും ചൊല്ലുവാനില്ലെനിക്ക്
ഇനിയൊന്ന് കാണുവാനിടയാകുമോ
അറിയില്ല ഞാനിനിയുണ്ടാവുമോ നിൻവിളി കേട്ട് മരിച്ചീടുവാൻ
വിനോദ് കുമാർ ടിവി,
രാമപുരം, കണ്ണൂർ
03.06.2024-11.21p.m
